Posted in 🏥 Health ⦁ 健康, 🧩 Life in general ⦁ 其他
離開香港之後,你會不斷咁掛住留低喺香港嘅所有人同物。呢個感覺,永遠都唔會走㗎。
但係我哋可以做嘅,係努力生存。
剛剛睇完鏗鏘集嘅《一個都不能少》,觸動到我一個擺埋咗一邊好耐嘅情感,仲喊緊。
我一直都集中訪問唔同嘅人,唔多講自己嘅感覺,因為我覺得自己唔重要。但係睇完呢條片,個心好酸。
雖然好多人係抱住走難嘅心態,但係你哋一定要照顧自己嘅心靈。離鄉別井真係好困難,唔好低估左自己情緒嘅波動。
其實係幾年前,我先至面對一直唔敢去觸碰嘅感覺,就係到底有幾唔捨得香港。
唔捨得嘅,唔止係人同物,而係以前生活嘅一套同回憶。我怕自己學習同適應新嘅生活節奏同態度之後,會唔記得咗香港。
但原來唔會㗎。
如果你唔選擇放棄,回憶係唔會走㗎。
如果你選擇去同家人同朋友維持聯繫,你哋之間愛係唔會淡咗㗎。掛住佢哋嘅話,要比以前更加主動,打電話俾佢哋,話比佢哋知。
媽咪,細佬,我真係好掛住你哋。13年來,每一日都冇少過。
港女 Kong Girl